यौन व्यवसायमा संलग्न किशोरीहरु अझै पनि होटल सञ्चालकको सम्पर्कमै

Advertisement

इटहरी, १४ असार, बालिका तथा किशोरीहरुलाई यौन कार्यमा लगाएर शोषण गर्ने होटल, रेष्टुरेन्ट तथा क्याबिनहरु बन्द भएपनि त्यस्ता बालिका तथा किशोरीहरु अझै पनि होटल सञ्चालकको सम्पर्कमा रहेको उप्का नेपालले जानकारी दिएको छ । वार्षिक लेखा परीक्षण कार्यक्रमका क्रममा उप्का नेपालले सञ्चालन गरेको अवसर, परियोजना र चुनौतिको विषयमा जानकारी दिँदै बालिका तथा किशोरीहरु अझै असुरक्षित रहेको जनाएको हो । प्लान नेपालको सहयोगमा उप्का नेपालले मनोरञ्जन क्षेत्रमा कार्यरत किशोरी तथा बालिकाको उद्धार र पुनस्र्थापना गर्दै आएकोमा बालिका तथा किशोरीहरु अझै जोखिममा रहेको जनाएको हो । त्यस्ता बालिका तथा किशोरीलाई होटल सञ्चालकले अझै दुरुपयोग गर्ने सम्भावना रहेको सो संस्थाले औल्याएको छ । यस्तै सरकारी निकायहरुले पनि सक्रियताका साथ काम गर्न नसकेको र नीतिगत समस्या भएको जनाएको छ । किशोरीहरुको लागि सञ्चालित उक्त परियोजनाका क्रममा महिलाहरु पनि सम्पर्कमा आउँदा के गर्ने भन्ने समस्या छ । यस्तै महिलाहरुलाई रोजगारी दिने रोजगारदाताले महिलाहरलाई बोझ र समस्याको रुपमा हेर्न थालेको प्रतिवेदनमा उल्लेख छ । महिलालाई काममा राख्नु भनेको झन्झट व्यहोर्नु हो भन्ने धारणा विकास भएको संस्थाले जनाएको छ । सुनसरीका होटल लज र रेष्टुरा जस्ता क्षेत्रमा काममा लगाइएका किशोरी वा बालिकाहरुमाथि श्रम शोषण, बालश्रम र यौन हिंसा विरुद्ध विभिन्न कार्यक्रम सञ्चालन गर्दै आएको उप्का नेपालले परियोजना सञ्चालन गर्दाको उपलब्धी र चुनौतिहरुसँगै आफ्नो वार्षिक आयव्ययका साथै प्रगती विवरण सार्वजनिक गरेको थियो । बालिका तथा किशोरीहरुको अवस्थालाई अध्ययन र विश्लेषण गरेर उद्धार गर्ने र विभिन्न सीपमुलक तालिम दिइ वैकल्पिक पेशामा आयआर्जन गर्न प्रोत्साहन गर्ने गरी प्लान नेपालको सहयोगमा उप्का नेपालले अवसर परियोजना सञ्चालन गर्दै आएको छ । उप्का नेपालले ४० जना निकृष्ठ बालश्रममा लगाइएका बालबालिकाहरुको उद्दार गरेर उनीहरुलाई समाज एवम परिवारमा पुनस्थापित गराइएको तथ्याङ्क सार्वजनिक गरेको छ । यस्तै ५७ जनालाई सीपमुलक तालिम दिएको, ५० जनालाई जिविकोपार्जनमा सहयोग गरेको, अनौपचारिक कक्षा शिक्षा १४ जनालाई दिइएको जानकारी दिएको छ । यस्तै जीवनउपयोगी कक्षामा जोखिममा रहेका तथा जोखिमको सम्भावनामा रहेका ३०३ जना बालिकाहरुलाई भेला गरेर उनीहरुलाई निरन्तर परामर्श दिने गरेको जानकारी दिइएको छ । त्यसैगरी परियोजनाले बालबालिकाहरुलाई बाल बचतमा समेत सम्लग्न गराएको छ । कार्यक्रमका अवसरमा होप परियोजना सञ्चालनको लागि यो वर्ष ३३ लाख ५० हजार रुपैयाँ खर्च भएको लेखापाल श्रद्धा लिम्बूले जानकारी दिइन् । यसैगरी अवसर परियोजना दोस्रोको लागि यो वर्ष प्रशासनिक र कार्यक्रम खर्च समेत गरेर जम्मा ९६ लाख ५८ हजार खर्च भएको जानकारी दिइएको छ ।

Advertisement

Labels: